ఎందుకని...?

మెరుపులా తాకింది నీ చూపు
కరిగిపోతానంటున్న మనసును కరడుగట్టించేదెలా...?

చివురుల్లో దాగిన మొగ్గలా
నన్ను నీలో దాచేస్తుంటే
నీ అపురూపం చూసి మురిసిపోతున్నాను.

మన్నుని తడిపి జీవం పోసే వానలా
నుదురు వంచి ముద్దులాడిన
నీ అనురాగం చూసి పొంగిపోతున్నాను.

పెనుతుఫానులా
నన్ను చుట్టుకుపోతుంటే మాత్రం
కంగారుపడుతున్నాను... ఎందుకని...?

నీ సాహచర్యంలో
ఈ కంగారయినా
మధురంగానే ఉంది... ఎందుకని...?